Post
by Ketevan Guliashvili » 22 ნოე 2011, 22:17
ტრული - ფიტარეთს ზღაპარი სამი მოგზაურისგან (გაგრძელება)
კიდევ საკმაო ხანს ტკეპნეს მოგზაურებმა დაცვენილი ფოთლები, როდესაც უეცრად დასრულდა ტყე და ისინი ლამაზ ველზე გავიდნენ. წინ დიდებული ციხის კოშკები დაინახეს, მარჯნივ კი, მდინარის მეორე პირას, კლდეში მღვიმეები იყო გამოკვეთილი. ნეტავ ვისი ციხეა, ვინ არიანმ მისი მცველები...
- მე წინ წავალ - თქვა დონ ნიკოლა დე ვახანმა. - შესაძლოა ვინმე ნაცნობიც იყოს... კარგად დავენახვოთ, მიხვდნენ რომ უბრალო მოგზაურები ვართ.
გადაკვეთეს მდელო, შევიდნენ ისევ ტყეში და კლდეზე ამაყად აღმართული დიდებული ციხის ძირში აღმოჩნდნენ. გარს მდინარიდან გადმოყვანილი წყლის ალყა ჰქონდა შემორტყმული, რომლის გარშემოც ხასხასა მწვანე მცენარეები იზრდებოდა. დონ ნიკოლა გაეშურა კარიპჭისკენ და საყვირში ჩაბერა.
სარკმელიდან ციხის მცველმა გადმოიხედა.
- ვინ ხართ და რისთვის მოხველთ?
- მე დონ ნიკოლა დე ვახანი ვარ, ესენი კი ჩემი თანამგზავრები, დონა ტრულა და დონ არჩილ დე დაკოტელი არიან. ჩვენ ფიტარეთის საიბუმლო ორდენის სიწმინდეებს ვეცით თაყვანი და ახლა ტანძიისკენ მივდივართ, რათა სატახტო ქალაქში დავბრუნდეთ!
- დონ ნიკოლა დე ვახანი? თქვენ ლეგენდარული რომაელი მოგზაურის ნიკოლუს ვახანუსის ჩამომავალი ხომ არ ბრძანდებით?
- ნამდვილად, გახლავართ!
- მაშინ, კეთილშობილო დონ, გთხოვთ მობრძანდეთ თქვენც და თქვენი თანამგზავრებიც. ციხეში ახლა ერისთავი ორბელიანის ვაჟი გახლავთ, და იგი მოხარული იქნება სადილად დაგპატიჟოთ.
მგზავრები ციხეში შევიდნენ. დაისვენეს, თითო ჭიქა თბილი ღვინო დალიეს და მიუხედავად სადილად მოპატიჟებისას გზა განაგრძეს.
ცოტაოდენი გაიარეს და ორბელიანთა მონები დაინახეს, მათ ალბათ ფიტარეთისკენ მიერეკებოდნენ, ბერებისთვის შესაწირად.
ხრამზე საცალფეხო ხიდით გადავიდნენ და მთისკენ მიმავალ გზას აუყვნენ.
გზა გველივით იკლაკნებოდა და სულ ზევით და ზევით, მთის წვერზე ადიოდა, სადაც სოფელი ტანძია მდებარეობდა.
მგზავრებმა რამდენიმეჯერ შეისვენეს. დონა ტრულა მთელი გზა ცდილობდა თანამგზავრ მამაკაცებზე უარესად არ ევლო, მაგრამ აღმართზე შეიმჩნა მისი სისუსტეც, და მოუკლო მან სვლას, იმედით რომ შემდეგ დაღმართზე აანაზღაურებდა. უკვე მოშივდათ კიდევაც მგზავრებს.. მაგრამ წინ კიდევ დიდი გზა იყო დარჩენილი. ბოლოს როგორც იქნა ფოთლოვანი წითელ-ოქროსფერი ტყე მწვანე წიწვნარმა შეცვალა და აი, ერთი აღმართიც და სოფლის კიდევ გამოჩნდა.
კიდევ ცოტაც და სიქაგაცლილი და მშიერი მგზავრები უკვე ტანძიიდან ქვეშისკენ მიმავალ გზას გაუყვნენ.
ტანძიელები გაკვირვებით უცქეროდნენ შორი გზიდან მომავალთ...
სოფელსაც გაცდნენ... უკვე სანარტელი გაუხდათ, ეგებ ცარიელი ეტლი ან ფაეტონი შეგვხვდეს და საქარავნო გზამდე ჩაგვიყვანოსო... მაგრამ ამაო იყო მათი იმედები..
ბოლოს დონა ტრულამ ვეღარ გაუძლო. მთელი გზა ცდილობდა კაცებისთვის ტვირთად არ ქცეულიყო, და ბოლოს ვეღარ აიტანა და დასვენება მოითხოვა.
დონ ნიკოლას კი ისე შიოდა რომ მოხარულიც იყო, შეისვენეს. სახელდახელოს ამოალაგეს საგზალი და დაიწყეს ჭამა, როდესაც გზაზე ურიკა გამოჩნდა. დონა ტრულის ცალ ხელში საჭმელი ეჭირა, ისე გაიქცა და გააჩერა ურიკა. მგზავრებმა გუდა-ნაბადი სწრაფად ჩადეს ურიკაში და გაემგზავრნენ საქარავნო გზისკენ, თან ჭამაც განაგრძეს.
მათი ხასიათი ბევრად გამოასწორა ამ წარმატებამ. ქვეშის დიდებული ციხეც გამოჩნდა.
- კეთილშობილო იდალგოებო და ძვირფასო დონა - მიმართა მგზავრებს ურიკისპატრონმა - მე ორბელიანის ყმა გახლავართ და ქვეშის ციხეში ვარ დაბარებული. ასე რომ არ იყოს თბილისამდე ჩაგიყვანდით, მაგრამ რას იზამ, უნდა დავშორდეთ, თუმცა ღრმად ვწუხვარ რომ მეტ პატივს ვერ გცემთ.
მოგზაურები მიუხედავად ამისა ძალიან მადლობლები იყვნენ და თბილად დაემშვიდობნენ ყმას.
საქარავნო გზაზე ჩამოსხდნენ ჩვენი მგზავრები იმედით რომ შეგვიანებულ ქარავანს მაინც მიყვებოდნენ. ამ დროს მათ მავრი მიუახლოვდა და მიესალმა
- სალამ ალეიკუმ კეთილშობილო ბატონებო და ქალბატონო. ალახის დიდება იყოს. სხვა რჯულის ვართ, მაგრამ ეგებ დავემგზავროდ ერთმანეთს? მე მარტო ვარ, ალახის წყალობით მუხამედ იბნ მუსტაფა, მარნეულში მივდივარ. ამ დროს ქარავანს ვეღარ იპოვით, ვერც დმანისიდან, ვერც კაზრეთიდან და ეგებ ერთად ავიყვანოთ აქლემი, იაფი დაგვიჯდება, და მარნეულში ჩავიდეთ? იქიდან კი საფოსტო კარეტა გადის სატახტო ქალაქისკენ.
მგზავრებს მოეწონათ მავრის აზრი და უმალვე იქირავეს აქლემი, შემოსხდნენ და მარნეულისკენ გასწიეს.
აქლემმა ძუნძულით ჩაიყვანა მოთენთილი მგზავრები ქალაქში.
აქ მუხამედ იბნ მუსტაფამ სიტყვა შეასრულა, მიიყვანა საფოსტო კარეტასთან მგზავრები და თბილად დაემშვიდობა მათ.
სამი მოგზაური უკვე ნახევარი საათის შემდეგ კი დედაქალაქის მისადგომებთან იყო მოსული.
ჭირი იქა
ლხინი აქა
ქატო იქა
ფქვილი აქა
მთებზე უკეთესი – ტბაში არეკლილი მთებია