შაბათს, 5 აგვისტოს, ტელეფონით დავუკავშირდი PSP-ს დანერგვის სამსახურის უფროსს ნათია ხაბეიშვილს. ავუხსენი სიტუაცია და მთხოვა მათი უფროსის სახელზე მომემზადებინა წერილი (მოცემულია ქვემოთ), რომელიც მოვამზადე და მეორე დღესვე ჩემი პირადობის მოწმობის ასლთან ერთად გადავეცი PSP-ს დაცვის თანამშრომელს.
“PSP-რიხტერის” დირექტორს
ბატონ გოჩა გოგილაშვილს
ბატონო გოჩა,
ამა წლის ივლისში თბილისში სამიოდე დღით თავის ერთ-ერთ ვაჟიშვილთან - ზეზვასთან ერთად ჩამოსული იყო სოფელ მუცოს მაცხოვრებელი ზურაბ დაიაური, რომელსაც მუცოში შეხვდა ჩემი ერთ-ერთი მეგობარი, რომლისგანაც შევიტყვე მისი ოჯახის გასაჭირის შესახებ. მეგობარს ვთხოვე ზურაბთან დავეკავშირებინე და სამწუხაროდ, მხოლოდ ცოტა ხნით მომეცა მასთან დალაპარაკების საშუალება. რამოდენიმე წლის წინ ზურაბს ჰქონია 12 სულიანი ოჯახი – მეუღლე და 10 შვილი. როგორც გავიგე, ნორმალური პირობების უქონლობისა და უსახსრობის გამო 2 შვილი გარდაცვლია. დღეს იგი მარტო ზრდის 8 შვილს (მეუღლე აღარ ჰყავს - მასზე საუბრისაგან თავი შეიკავა). საუბრისას ზურაბმა ახსენა, რომ გაჭირვების გამო, მსხვილფეხა საქონლის ნაწილის გაყიდვამაც მოუწია; რომ მთელ მუცოში მისი ოჯახი ერთადერთია, რომელმაც წლევანდელი ზამთარი იქ გაატარა. მან ისიც თქვა, რომ ძალიან განიცდის გაუსაძლისი პირობების გამო სოფლის დაცლას.
ინტერნეტში არის ფორუმი
www.karavi.ge , რომლის წევრებმაც გადავწყვიტეთ შეძლებისდაგვარად (ტანსაცმლით, საკვები პროდუქტებით, მედიკამენტებით, წიგნებით, სათამაშოებით, კონკრეტული რჩევა-დარიგებებით და ა.შ.) დავეხმაროთ უკიდურესად გაჭირვებულ ოჯახებს საქართველოს მთიან მხარეებში. ჩვენი არჩევანი სოფელ მუცოზე გაკეთდა.
ჩვენ არ გვსურს, რომ კიდევ ერთი სოფელი შეუერთდეს მიტოვებული სოფლების სიას.
აღნიშნულ მხარეში გამგზავრებას ვაპირებთ სავარაუდოდ 15 აგვისტოდან 20 სექტემბრამდე დროის ინტერვალში.
ვფიქრობთ კარგი იქნება თუ ზემოაღნიშნულ ოჯახს შეძლებისდაგვარად მივაწვდით ისეთი ტიპის მედიკამენტებს, რომელთა მიღებაც უსაფრთხო იქნება ექიმის დანიშნულების გარეშე, თუნდაც პროფილაქტიკური მიზნებისათვის, ვიტამინები და სხვ.
ყოველივე ზემოთქმულიდან გამომდინარე, გადავწყვიტეთ დახმარებისათვის თხოვნით მოგვემართა თქვენთვის. თუ კი თქვენს ფირმას ამ ტიპის დახმარების აღმოჩენის საშუალება აქვს, მადლობელი ვიქნებით თქვენი მხრიდან გაწეული დახმარებისათვის.
წინასწარ გიხდით მადლობას.
პატივისცემით,
გ. ბედენაშვილი
6 აგვისტო, 2006 წ.