ევროკავშირი ურჩევს საქართველოს რუსეთთან ურთიერთობა არ გაიართულოს
მას შემდეგ რაც ქართულმა ტელეკომპანიამ ეთერში ყალბი „ახალი ამბები“ გადასცა, რომელიც რუსული არმიის თბილისკენ გადაადგილების შესახებ იუწყებოდა, ევროკავშირმა საქართველოს მთავრობას რეგიონში სიტუაციის გართულებისგან თავის არიდება ურჩია.
შაბათს, საქართველოს პრო–სამთავრობო ტელეკომპანია „იმედის“ პრაიმ–თაიმში გასული 20 წუთიანი რეპორტაჟი იუწყებოდა, რომ რუსული ტანკები თბილისისკენ დაიძრნენ, მას შემდეგ რაც პრეზიდენტ მიხეილ სააკაშვილის ყოფილმა თანამებრძოლებმა მოსკოვს შიდა პოლიტიკურ არეულობაში ჩარევისკენ მოუწოდეს.
„მე შეწუხებული ვარ ცოტახნის წინ თბილისში ყალბი რეპორტაჟის გავრცელების გამო“, – განაცხადა ევროკომისიის პრეზიდენტმა ჟოზე მანუელ ბაროზუმ საქართველოს პრემიერ–მინისტრ ნიკა გილაურთან ერთად გამართულ პრეს–კონფერენციაზე.
„მე მინდა ვურჩიო საქართველოს თავი შეიკავოს ნებისმიერი ისეთი ქმედებისგან, რამაც შეიძლება კიდევ უფრო გაართულოს ადგილობრივი ან რეგიონალური დაძაბული ურთიერთობები“.
გილაურმა პრეს–კონფერენციაზე განაცხადა, რომ „იმედი” კერძო ტელეკომპანიაა და რომ რეპორტაჟის საკითხი საქართველოს ტელეკომუნიკაციების დამოუკიდებელმა კომისიამ უნდა შეისწავლოს.
რუსეთ–საქართველოს ომის დასრულებიდან 18 თვის შემდეგ, გადაცემამ, რომელიც იმასაც იუწყებოდა, რომ სააკაშვილი მოკლეს, საქართველოში პანიკა გამოიწვია.
გაფრთხილება იმის თაობაზე, რომ გადაცემა იმიტირებული იყო, ტელეკომპანიამ რეპორტაჟის დაწყებამდე და მისი დასრულების შემდეგ გააკეთა, თუმცა მაყურებლის უმრავლესობას ეს არ შეუმჩნევია.
საზოგადოების შეშფოთებამ საფუძველი დაუდო დავას გადაცემის რეალურ მოტივზე, რომელიც „იმედის“ განცხადებით ოპოზიციის ლიდერებსა და რუსეთის პრემიერ–მინისტრ ვლადიმერ პუტინის კონტაქტებზე გაფრთხილება გახლდათ.
ოპოზიციის თქმით, ამ გადაცემის უკან მთავრობა იდგა, რადგან ტელეკომპანიის ხელმძვანელი სააკაშვილის ახლო მოკავშირეა.
ორშაბათს პრეზიდენტის სპიკერმა განაცხადა, რომ ბრალდებები „აბსურდულია“. მაგრამ სახელმწიფოს მხრიდან მედიით მანიპულაციის თემა საქართველოს დასავლელ მხარდამჭერებს სერიოზულად აწუხებთ.
ბაროზუმ განაცხადა, რომ ადგილობრივი არჩევნები, რომლის ჩატარებაც მაისში იგეგემება „უკიდურესად მნიშვნელოვანია“ საქართველოს და ევროკავშირის ურთიერთობებისთვის და დასძინა, რომ საქართველოს სჭირდება დემოკარტიული რეფორმების გაღმავება, მათ შორის მედიის თავისუფლების მიმართულებით.
